西沙湿地捉蛸蜞

文/陆茂清

6月里勿冷勿热，交关人到崇明西沙湿地来旅游。湿地浪蛸蜞多得来摸老老，游客见了手脚发痒侪去捉，有钓嗰，有拿棍棒撬嗰，有手伸进洞里掏嗰；有一个人捉，有搭档捉，欢声笑语，闹猛得勿得了。

栈桥浪来了一家三代，“蟹蟹，我要蟹蟹！”孙子指着下面又喊又跳。只见蛸蜞有个躲辣洞口头，有个正辣打相打，还有个东跑西走寻食吃。做爸爸个马上跳下去捉。蛸蜞小末小，来得刁，看见人，洞里跑，眼睛一眨侪勿看见了。

也有一只触霉头，心急慌忙进错了洞，因为洞口忒小，轧来轧去钻勿进去，只好退出来乱窜。

爸爸三步并作两步冲过去，正要伸手去捉，看见蛸蜞个两只螯竖了出来，张开口子像老虎钳，心里吓丝丝，伸出去个手缩了回去。爷爷奶奶连忙出点子，连喊“用脚踏，用脚踏”。儿子言听计从，一脚踏下去。松开脚一看，蛸蜞壳已经碎脱了，只有两只小脚一动一动垂死挣扎，眼看就要死脱了。

孙子哭出乌拉，吵着要爸爸让蛸蜞活转来。奶奶边给孙子揩眼泪边讲：“乖囡覅哭，叫爸爸赔一只大嗰。”勿过一两分钟，爸爸送来一只雄蛸蜞，还是红颜色嗰。

孙子马上破涕为笑：“爸爸真好，爸爸搿只蟹蟹真大！”

边浪游客听见了，侪笑出声来。奶奶听了，边笑边训孙子：“爸爸勿是蟹蟹，乌小蟹乌嚼乌话，当心吃生活。”一胖一瘦两个小伙子也辣捉蛸蜞，一开始是各归各单干，一时捉勿着，后来讲好两家头互相合作。正巧几只蛸蜞辣洞外头白相，两个人定了一个计策，从两边轻手轻脚围过去，突然加快脚步，嘴巴里大喊一声“捉牢伊！”

蛸蜞立刻吓得朝洞里向钻，有两只急吼吼钻进了同一只洞里。两个小伙子先用脚辣洞边头蹬，嘴里“嘘嘘嘘嘘”个赶。赶了一歇勿来事，只好硬弄，去洞里掏。

胖小伙子自告奋勇打头阵，袖子管一撸，蹲下来手朝洞里伸。可惜臂把忒粗，伸勿进去。瘦小伙子马上讲：“我臂把细，让我来。”手是伸进洞了，但是够勿着，索性脚馒头着地，面孔贴到烂泥浪，终于碰到蛸蜞了，揪牢蛸蜞脚就朝洞外拖。呒没想到用力过猛，搿只蛸蜞脚断脱了，蛸蜞又缩了进去。“今朝捉勿着搿只蛸蜞勿做人！”伊衬衫一脱，重新匐到烂泥里……

到底捉出来了，是一只特别大个蛸蜞！再接再厉，第二只也弄着了，一雌一雄正好一对，捂心得勿得了。

真是团结力量大，辰光勿多，十几只蛸蜞到手。勿过代价也蛮大嗰，休闲衫变成迷彩服，面孔浪也沾了勿少烂污泥，只剩两只眼乌子一眨一眨。