阿拉老早用“围脖”

文/侯宝良

天冷了我翻翻箱子，寻出勿少老早冷天用个“装备”，其中就有好几只绒线领圈。有店里买个羊毛机织领圈、也有我姆妈用细绒线、粗绒线亲手结出来个。领圈是一种长方形绒线织品，摊开来大概25厘米长、6厘米宽。至于织法，一般就是平针织法、厚实眼有元宝针，也叫“玉米针织法”，再辣两头钉三四粒揿纽，一条简化版“围脖”就做好了。

现在迭种物事大多数后生家已经“看勿懂”了。我有趟问过一个小年轻：“侬晓得迭物事派啥用场？”伊朝我看看，讲：“当护膝嘛像啥忒短？”看伊摇头讲勿出，我笑出了声，侬只“木瓜”！搿是阿拉老早冷天出门辰光用个领圈，我顺手就拿起一只领圈沿牢伊个衣裳领头，转到后脑个发际地方帮伊揿好揿纽。拍拍伊肩胛，问：“是否暖热？”伊开心个讲：“咦，老灵个！迭能一来，外头风再大也吹勿到头颈里了。”我告诉伊，老早子大家服装单调，冬天侪穿中装棉袄，侪是立领式样，搿种领圈邪气好用。辣埃歇辰光，搿种领圈还是一种时尚用品，每个人侪有好几只，平常可以“翻花头”。

老婆眼睛尖，顺手拿起一只灰颜色细绒线结个双层领圈问我：“想想看，迭只领圈啥人送拨侬嗰？”“搿哪能会忘记脱！还是阿拉谈恋爱辰光，侬陪我辣医院里吊盐水辰光结个，我勿是叫伊‘温暖牌’嘛。”尽管快四十年了，我还是立时三刻就回想起了当时我感冒发高烧，挂急诊后要吊几瓶药水，伊陪我一个夜里就结好了。结婚后个好几年，搿只领圈我一直套辣头颈里。

老婆又拣出一只小一号个领圈，拿了手里勿作声了。我看看伊，晓得伊又辣辣想女儿了，正是慈母手中线，游子身上衣，做娘嗰就是掼勿脱对小囡个思念。我脑子里也勿由浮现出女儿小辰光戴着迭只领圈到处跑个活泼景象。

时光匆匆，好多年一晃就过去了。女儿一点点长大，从小学到中学再到大学，然后出国深造，今年阿拉也有了外孙。

虽然现在到了冬天，市面浪有各种各样个保暖用品，搿种简陋个领圈已经呒没啥人用了，但老早子伊带来个温暖是忘记勿脱嗰。