停勿下来个老傅

文/赵韩德

记得年轻辰光，单位里有一个姓傅个老领导，阿拉侪叫伊老傅部长。上世纪八十年代改革开放，厂里为了引进先进设备，学习先进技术，经常需要派人出国。虽然每趟出国个人员当中主要是专业人员，但是总还是需要安排个别领导带队。搿种机会当年邪气吃香，但老傅部长每趟侪是笑嘻嘻讲：“同志们先去。同志们先去。”结果直到退休，公费出国伊一趟也呒没去过。

老傅勿是一个欢喜呆辣办公室里个人，经常能看到伊辣厂区里到处跑。埃歇辰光伊虽然已经五十几岁了，但思路敏捷，性格活跃，腿脚灵便，拿手底下十几个科室管理得井井有条。每个礼拜一，伊会到每个科室走一圈。科室散布辣辣厂区和码头，伊踏一辆“老坦克”（旧自行车），兴冲冲赶东赶西。到船体科，伊戴好安全帽，劲头十足上船台看分段拼装；到机械科，伊兴致勃勃下车间看曲轴加工。

老傅喜欢京戏。有辰光科室里因为各种原因，气氛比较压抑，被老傅看到了，伊就讲“阿拉来段京戏，活跃活跃。”老傅祖籍北京，爱唱“我本是卧龙岗散淡的人……”

老傅不但自家到处跑，还要求工会主席带动职工跑。结果阿拉经常被组织起来，辣春暖花开个辰光，出外远足。队伍里老傅顶开心。伊同工会主席走辣前头，就像打仗冲锋个旗手——当然，手里举个是旅游用个蓝色三角旗。辣迭面三角旗个带领下，阿拉到过漫漫竹海，茫茫大湖，金沙海滩，一线天高山。可惜后来有领导放话讲：“介许多人一道出去，出了安全事故哪能办？”再后来，搿类活动就少了。

除脱带队外出搞活动，老傅更要求伊手下个干部分头跑。跑啥地方呢？

跑有困难个职工家庭。有一年台风过境上海，漫天狂风暴雨，我住辣浦东小镇上个老家进水了。水从水泥地面冒出来，从门槛流进来。全家人忙了整整一夜天，到天亮还辣朝外头铲水。我打伞，迷迷茫茫蹚水跑到公用电话站，打电话请假。

呒没想到，过脱半个多钟头，屋里来了两个人，一个是工会主席，一个是工会组长，讲是领导老傅，要求各科干部，一定要到今朝请假个职工屋里向，帮忙解决困难。两个人一面讲，一面就要帮忙铲水。我邪气感动，讲阿拉自家能够克服。

辰光就迭能一年两年三年……勿知勿觉过去了，老傅天天辣部长办公室里忙来忙去。厂里业务稳定了，技术成熟了，出国机会越来越少。终于，老傅要退休了。为了干部队伍年轻化，上级也呒没回聘留用。职工大会浪，工会主席透露了迭个消息以后，大家一片叹息，我心里也蛮难过嗰。

过了交关日脚，某个礼拜一早浪，阿拉科里突然有人讲，真可惜，现在听不到老傅唱京戏了。又有人讲，不晓得老傅现在辣做啥？大概辣屋里向带孙子吧？坐辣窗口边个老李嘿嘿笑了。老李和老傅住辣同一个工人新村，平常消息灵通，看伊个表情，肯定有料。果然，老李喝了口茶，慢慢讲道：“傅部长退休之后，不晓得哪能想嗰，去读了个导游培训班，拿导游资格证考出来了。现在三天两头带团，勿但全国各地跑，还常常带团出国。喏，上个礼拜刚刚从澳大利亚回来。”看来，老傅仍旧是那个爱动爱跑个老傅。