到上海去

微信扫码看视频 听钱程沪语朗读

◆周钰栋

今年是浦东开发开放35周年。35年来，上海人民用自家个汗水和智慧，辣浦东迭块热土浪创造了令世界瞩目个成就。尤其是阿拉迭些辣浦东生活、工作过个人，体会更深。单看“到上海去”迭句老早浦东人常常挂辣嘴巴边浪个闲话，就晓得浦东个变化有多少大。

前几日，有几位过去教过个学生从杨浦区跑到我浦东个屋里来看我。伊拉一进门，我就讲：“真勿好意思，介热个天，还跑介远个路从上海赶过来……”闲话还呒没讲完，学生就笑了：“老师，侬哪能介搞笑啦，好像侬住辣外国一样？”我赶紧说：“勿是勿是，阿拉搿辈人讲惯了呀。老底子，浦东人要去南京路、淮海路买物事，或者去中山医院、仁济医院看毛病，再勿然到浦西走亲访友，侪叫‘到上海去’。每趟侪要天勿亮出门，先坐木船到镇浪向，再乘长途汽车到轮渡站，乘轮渡过江，到目的地已经大半天过去了。匆匆忙忙办好事体，还要抓紧辰光赶回来，否则乘勿到长途汽车个末班车，就要辣浦西住旅馆，第二天再回来。再讲，要是想乘火车去外地，买到个还是早班车票，就要提前一天赶到上海去过夜，否则哪能赶得上火车？所以才有了‘宁要浦西一张床，勿要浦东一间房’个老话。”

“现在就好了，黄浦江上头有大桥，下头有隧道，公交、地铁织成一张立体交通网，一下子就拉近了浦东、浦西个距离。年轻人出门坐地铁，不管是上班还是白相，再也不会讲‘到上海去’了，只讲‘到单位上班’，或者‘到新天地、静安寺去白相’。就连看病，也有仁济东院、儿童医学中心，斜气便当。虽然现在阿拉搿辈浦东人嘴巴里，还会拿到浦西去叫做‘到上海去’，但迭个是老一辈人对美好生活个向往刻进骨子里了，改勿脱了。”

再讲，当年我虽然工作辣浦东，屋里却住辣浦西。因为交通勿便，我就住辣单位个集体宿舍里，一个礼拜回去一次。因为住宿舍个侪是浦西人，所以浦东个同事就拿阿拉住个宿舍叫“上海人宿舍”。一到周末，单位里个浦东同事就会跑到阿拉宿舍问：“明朝啥人到上海去？帮我带点物事来好（口+伐）？”阿拉听到搿种要求，侪斜气乐意帮忙，至于要买个物事一般侪是服装鞋帽、糖果蛋糕、小囡个玩具咾啥。有辰光，伊拉还会拿阿拉从上海带回来个物事，辣同事面前炫耀：“侬看，赞（口+伐）？是搿搭个上海人帮我到上海去带来个。”

呒没想到，短短三十五年发展下来，搿种买物事非要“到上海去”个做法已经成了过去式。15分钟生活圈，实现了“城市让生活更美好”个愿望，而且像陆家嘴、花木迭些地方个繁华程度，已经可以跟外国大城市别苗头了。“到上海去”迭句闲话现在已经换了频道，为了实现“追求卓越”个目标，“到上海去”已经成了交关筑梦人个理由。