秋日甜汤润心肺

◆沈一珠

再过两天就是秋分了。尽管搿两日还是高温天气，但请一定要相信，秋分到了，真正秋高气爽个秋天也就勿远了。

有一样好吃个物事是秋天里个特供，伊就是龙眼，得迭个名是因为伊个果核像眼珠一样乌黑铮亮；又因为伊成熟个辰光，齐巧是桂花飘香个日脚，所以，伊又得名“桂圆”。

龙眼还有一名，叫荔枝奴，因为龙眼搭子荔枝除脱生长环境差勿多，“龙眼，树如荔支，但枝叶梢小，壳青黄色……肉白而带浆，其甘如蜜。一朵五六十颗，作穗如葡萄然。荔支过即龙眼熟，故谓之荔支奴。”《南方草木状》里记录个意思是，龙眼荔枝树叶树枝差勿多，果子侪甜甜蜜蜜，只不过，龙眼成熟辣荔枝后头一眼，所以龙眼位居老二。

龙眼另有一个蛮好白相个叫法——益智，一是因为古人讲，吃了龙眼让人聪明；另一是讲，龙眼本就是个聪明果子，因为大部分水果个肉搭子核侪是紧紧抱辣一道个，龙眼（荔枝同样）肉跟核半分半合，吃起来便当，播种也方便。

现在已经老少有人要拿龙眼和荔枝分出个江湖地位来了，而是约定俗成，新鲜果子以荔枝比较吃价，晒干果子就是桂圆比较尊贵；只勿过，新鲜也好，晒干也好，两者因为糖分充足，使得有痛风、血糖高等问题个人望而却步，迭个也只好算是甜蜜带来个伤害了。

正值秋风起、雨水稀个日脚，阿拉勿妨以龙眼为主，新鲜上市个板栗为辅，炖一盅桂圆栗子汤，润一润心肺。

材料：龙眼干若干去壳；新鲜板栗若干，用刀开小口，开水泡10分钟，冷水激一激，去外皮；准备一点黄片糖，就是以甘蔗为原料、未经高度提炼制成个红黄色糖块，气味自然香甜。

做法：镬子里倒适量水，加栗子、黄片糖烧开，炖廿分钟左右，龙眼摆下去，再小火炖半个钟头就好了。