德国队一天世界

娄一晨

那天，世界杯小组赛最后一轮，日本队逆转战胜西班牙，直接导致德国队被淘汰出局。赛后，笔者一时兴起，忍不住发了一段视频，激情愤怒了一把。结果，当天晚上就有老友S君来电劝慰。

S：老娄啊，侬做啥介激动啦？抖音视频传了哈快！我此地交关朋友侪来问我侬老娄阿是赌德国队输钞票了？

我：唉，我就晓得会得出迭种声音，讲我多数是因为赌球输钞票所以发老急了……老兄啊，侬去看看我那天比赛之后发额一条微博，有图有真相！我帮几个朋友提供额足球彩票方案里厢选额就是日本队3、1，说明啥？说明我预计到西班牙有可能要出事体呀……但是我自家直播额辰光还是勿敢相信西班牙人真额会得输脱……

S：是呀，大家侪想勿到……所以我就想问侬假使德国队也像侬视频里厢讲额最后也放水，放拨对面哥斯达黎加，抱牢西班牙一道淘汰，会得哪能？

我：唉，现在再来讨论迭额可能性已经没意思来……我视频里勿是讲了嘛？最关键是德国人做勿出来呀……

S：我记得比赛当中转播镜头拨到国际足联主席，只面孔绝对难看哦……侬讲会勿会当时辰光主席先生对德国队发过啥声音？

我：哦，侬老兄结棍！看事体一针见血！直播结束我帮刘越两介头侪觉着有迭额可能性呃，而且可能性非常大！侬想，当时辰光下半场刚刚开始日本队就反超了，接下去就有消息传过来哥斯达黎加也扳平也反超。因主席只面孔马上就勿对了！要命啊，德国西班牙一道拨淘汰？日本哥斯达黎加一道小组出线？乃么本届世界杯勿是要招势坍足啦？尤其是哥斯达黎加，输脱0比7还好小组出线？所以镜头里厢可以看到因主席马上手机拎起来，估计就是打电话拨德国足协，关照伊拉脑子拎拎清爽，勿许瞎来八来！再后来么大家就侪懂了，德国队五斤吼六斤连进三只……

S：个么侬讲西班牙为啥啦？真额是为了淘汰赛挑对手？伊拉就没想到过假使德国队输脱个闲话伊拉西班牙人自家也有危险？

我：唉，我只好讲西班牙人也是一样勿相信德国队会得输脱！挑对手是正常反应。有机会好挑做啥勿挑？隔壁小组里厢总归是摩洛哥好踢咯？而且还有机会避开巴西队。但是当日本队先反超隔手哥斯达黎加又反超额辰光，西班牙是真额有点发老急了。

S：个么就只好讲德国人戆咯？

我：唉，一天世界……