拿蟹钳壳拼蝴蝶，侬会（口+伐）？

文/陈日旭

上海人勿仅会吃，而且吃功好，有句闲话叫：“西风起，蟹脚痒。”大闸蟹是勿少上海人个心头好。最近又到了吃蟹个辰光，菜场、超市、街边小店，到处侪能看到大闸蟹个身影。现在生态环境好了，除脱老牌阳澄湖蟹之外，崇明大闸蟹也来轧闹猛，半斤多一只，看起来居然有点凶狠霸道个气势。我勿由想起五十几年前屋里向买蟹吃蟹个事体。

记得当时曹家渡长宁路口有条小名叫“臭河浜”（因路边有臭水沟，今长宁支路）个弹硌路，里向除脱有菜场，还有各种旧货摊、“小热昏”（一种马路说唱艺术）、马戏表演等等，市井气氛交关浓。深秋季节一到，西北风一刮，迭个地方就是大闸蟹个天下。特别是从下半天开始，一直到黄昏头，菜场收摊了（埃歇辰光菜场只有早市），大闸蟹个摊头摆得铺天盖地，侪是一只只老大个铁丝笼子，里向个蟹要么拼命朝上爬想逃出“围城”，要么“扑落扑落”吐泡泡。买蟹个人看中哪一只，摊主就会快手快脚伸手进笼子里捉出来，用草绳扎起来，等到挑好几只扎成一串，顾客付过铜钿，就可以高高兴兴拎回家，尝鲜去了。

最闹猛个是黄昏头，太阳已经落山，迭个地方仍旧灯火通明。有摊主为了吸引顾客，专门用竹竿挑起一只用三夹板锯出来个大闸蟹模型，同一般人家摆酒席个圆台面差勿多大，两只模型个眼睛还装了两只100瓦个大灯泡，果然生意邪气好。埃歇马路浪向勿大看得到霓虹灯，天黑了一般只有路灯照明，像搿搭介闹猛个地方真个勿多。像阿拉搿种住辣附近个小囡，即便勿买蟹，到迭种地方白相相，也蛮开心嗰。

再讲吃蟹。阿拉屋里吃蟹，主要是等阿爸领了工资，才到蟹市场去转转，看到有价钿合适嗰就买几只。经常听大人讲起“买蟹经”，啥个“九雌十雄”“九月团脐、十月尖脐”之类。买个辰光挑好雌雄，做到心中有数。买回来之后，由姆妈动手，一只只蟹侪边用自来水冲洗，边用刷子刷干净。汏个辰光一勿当心，被蟹夹手或有蟹逃出盆外也是常事。汏清爽以后，再用扎鞋底线拿蟹捆牢，摆进大钢精锅里蒸十分钟左右。蒸个辰光，姆妈会拿姜末、白糖、醋、味精等调料装成一小碟一小碟，摆到每个人面前，等全部摆好，蟹正好出锅。阿爸是一家之主，伊面前少勿脱一杯绍兴黄酒。阿爸吃得高兴了，会讲聊斋故事拨阿拉小囡听，我听得汗毛凛凛。祖母勿吃蟹，但伊会辣旁边出“谜谜子”（谜语），叫阿拉猜：“卖相实在凶，钳牢勿肯松；杀杀呒没血，烧烧满身红。”

另外，记得阿爸吃蟹真“老鬼”（意为经验丰富）。伊耐心好，吃起来笃悠悠，不仅蟹壳吃得清爽，连蟹腿、蟹钳（蟹螯）侪吃得一干二净。伊还会拿蟹钳壳拼成蝴蝶，粘辣墙头浪好几天，老好白相嗰。