七彩游戏棒

文/宓重行

小辰光白相过交关好物事：顶橄榄核、抢四角、绕口令、游戏棒……大多数侪是练脑又健身，让小朋友百玩不厌。我放学回家做好功课，经常要白相到姆妈喊“吃夜饭”才肯停！

其中游戏棒个大名叫“七彩金银游戏棒”。其实不过就是几十根削制光洁、漆成五颜六色个竹棒；两根中指长短、阳春面条粗细。包装盒里还有张“计分说明书”：标明金、银、红、黄、蓝、白、黑各色竹棒分值，其中金、银两色分值最高，依次是其他颜色。红色又分大红、淡红、粉红、玫瑰红，绿色又分果绿、墨绿、湖绿、青草绿……所以所谓“七彩”并不只是“赤橙黄绿青蓝紫”！当时搿种既漂亮又益智个玩具辣文具店要卖到2角洋钿，辣校门口附近个小摊头浪就便宜了，勿过颜色种类相对较少，手感也会显得粗糙。记得当年我总是辣铅笔盒子里囥一袋游戏棒带进学堂，吃过中饭就与同学一道白相一歇。

游戏规则相当简单，先由一人拿整捆游戏棒竖直放辣台面浪，松手以后整捆竹棒散落辣台面浪，看起来就像脚踏车个轮辐条，然后几个小朋友轮流逐根拾取。假使有人触动了其他游戏棒，搿轮游戏就结束了，计算每个人拾起来个游戏棒分值，高分获胜。然后再重新开始下一轮游戏。听起来好像呒没啥难度，其实白相起来并勿容易，比如某根高分竹棒辣其他竹棒下面，为了避免搿根高分竹棒被其他小朋友拿到，轮到侬出手个辰光就要想办法先拿伊拾起来，其中有勿少窍门，如“揿头”“拎腰”等等。当然，假使竹棒重叠得结棍了就呒没办法了，拿现在闲话讲就是“可望而不可及”，只好让拨下家来。

记得当时每次白相个辰光，教室侪会有一圈人辣旁边出主意、算分数、大呼小叫，开心得勿得了。有戴“护导”臂章个老师路过也勿会训斥阿拉，有辰光还立辣旁边帮阿拉出主意。老师讲迭种游戏可以提高计算能力。

现在年纪大了，当然勿会再痴迷搿种小游戏，但是回想起来，搿种游戏棒的确有利于培养耐心和动手能力。啥人心浮气躁，啥人心平气和，辣游戏当中侪会清清爽爽反映出来。大家从小侪懂了：眼睛专门盯牢高分金、银棒，只想快点抢到手——嗨嗨！

心急吃不着热粥：手忙脚乱当中偏生就会犯规，结果连低分棒也拿勿到几根。假使当当心心一根一根拿，说勿最后个高分金、银棒反而落到侬手里。

前段辰光，偶然从网浪看到游戏棒个介绍，但已经搞成盒装圆木棒个“精装豪华型”。大约是考虑到细竹棒不安全，就是颜色太少，看起来单调。我忽然想到现在个小朋友勿缺各种高科技玩具，但是对小囡来讲，玩具个科技含量勿见得越高越好，勿少高档电子玩具放辣橱窗倒是蛮弹眼落睛，勿过好像除脱观赏性比较强，对小朋友勿会有多少切实帮助。反而是游戏棒之类个简单游戏，更有利于让小囡动脑动手。玩具，应当有点教育意义。