寻到“串友”多“串门”

文/周曙明

串门，就是“到别人家去闲坐聊天”。老底子“串门”是乡村生活个常态，到了现在，小区里隔壁邻居互相勿认得也勿奇怪，因为大家侪早出晚归，只要早浪出门与夜里回来个辰光相差几分钟，就可以“完美错过”。勿过，对勿少退休老人来讲，“串门”是伊拉少数几种与社会接触个方式，古希腊哲学家亚里士多德讲“人是一种社会性动物”，所以从某种意义上看，“串门”是勿少老年人个“刚需”。

随着浦东开发建设，原来住辣东宅个张伯伯和原来住辣西宅个陆婶婶侪动迁到了小区里，住进了有电梯个高层楼房，但是伊拉差勿多天天要回到老宅来白相。来了以后，就坐辣阿拉屋门前个丝瓜棚下头，搭伲娘子，还有大阿哥、小婶妈咾啥一道茄山河。经常讲起个一个话题就是住辣小区里勿开心，一个楼面浪好几家人家侪是“黄牛角，水牛角——各管各”，就是辣电梯里向碰着，也是“面东人看面西人”。“唉——”陆嫂嫂叹一口气讲：“登辣十楼浪向，就像登在鸽子笼里。每日天吃饱仔饭，也呒没几化家务要做。多看电视么，眼睛吃不消；小区里走走么，脚脚踏生地，眼眼见生人”。

是啊，老早村子里向人人认得，家家熟悉。一早开出门来，碰着熟人，就打个招呼：“张家姆妈，侬早饭吃了（口+伐）？”“黄伯伯，迭能介早，侬啥地方去啊？”“老爷叔侬又到镇里去啊？”一日天就又开始了。

早浪向，我端仔一碗热粥，就着两条萝卜干，走东家串西家，迭个叫“卖饭碗”。李家姆妈看见了，就讲：“啊呀，小弟个粥，哪能薄来像面镜子么！小囡要养僵脱哉。来吃一块摊面饼。”我连忙讲：“谢谢李家姆妈！”

老早子，槿树园里人家呒没田，过日脚侪靠“捞鱼摸虾”。爷叔伯伯咾啥天天吃早饭侪要去大场地。伊拉一面吃一面商量，啥地方野浜头里螺蛳多、蚌多、虾多，啥地方小菜场里野河鲜好卖……过后，三人一组，五人一伙，背起簏，掮起撩网、挟网、螺蛳网，去找野浜头“寻饭吃”。

落雨以后，田里向生活勿好做。阿拉姆妈就拿只铺好个鞋底、几根扎鞋底线，到西新宅老妈妈屋里去，一边做针线生活，一边茄山河。张家阿大已经廿九岁了，拜托我姆妈“缸香炉配木蜡台”——寻一个家境差勿多个姑娘家；李家姆妈个侄囡过年要廿八了，伊拉娘也急得要死。沪谚说“只有黄瓜落苏沿街卖，哪有黄花闺女送上门？”，真是难煞李家姆妈了。几趟“串门”以后，小姑娘小伙子两家头个婚事居然谈成功了。邻舍隔壁侪讲“迭趟周家姆妈功劳大，十八只蹄髈少勿脱！”

当然，“串门”也勿侪是好事体，也有管勿牢嘴巴个人辣背后“添油加醋”讲别人家个是非，明明捕风捉影，却讲得活灵活现，结果害得别人家屋里闹矛盾。迭种背后“扇风点火”个人被大家称作“破蒲扇”，看见“破蒲扇”来串门，大家快点关门，啥人也勿想卷到是非堆里去。所以末，也有勿少人反对乱串门，但是反对归反对，有事体归有事体，欢喜串门个人仍旧照样串门。作为一种传统社交形式，通过串门，有喜事大家分享，有难事大家帮忙，有苦闷大家分解。怪勿得张伯伯，陆婶婶初进小区呒没地方“串门”，就感到不习惯了。

有趣个是，搿种情况最近到有所改变，毕竟实行垃圾分类之后，小区里侪规定了定时定点厾垃圾，勿少邻居也终于有机会见面了。俗话讲：“一回生两回熟”，对老年人来讲，勿妨寻到“串友”多“串门”。