鸡毛掸子和饼干听

文/周伟民

老早仔交关屋里侪有鸡毛掸子，用来清理灰尘。过去工业勿发达，马路浪车子也少，灰尘勿多，台面浪掸掸，扫扫地，屋里就干净了。当年鸡毛掸子也是分级别嗰，大户人家用个鸡毛掸子往往用较长个雄鸡毛制作，毛色油亮，插辣瓷瓶里也是一种摆设。普通鸡毛掸子用较短个母鸡毛制作，通常插辣门背后个布袋里。后来灰尘越来越多，光靠鸡毛掸子就勿能解决问题了，而且，灰尘从台面浪掸到地浪，人一走动，还会飞起来，所以就改用抹布和拖把。

鸡毛掸子后来大多是两条出路。长鸡毛做个鸡毛掸子成了做毽子个原料，埃歇辰光屋里有长鸡毛个小囡老吃香嗰，小伙伴侪要拍伊马屁，目的就是想弄几根长鸡毛。另外一部分鸡毛掸子变成家长教训小囡个工具，小囡犯了错误，就用鸡毛掸子抽两记。一般是抽屁股，其实是勿大痛嗰。

和鸡毛掸子差勿多光景嗰，还有饼干听，马口铁皮做嗰。当时基本浪每家人家屋里侪会准备一到两只饼干听用来装小食品。勿少人家辣饼干听里放炒米花、玉米花（上海人叫六谷胖）、蚕豆（爆松个干蚕豆）、年糕片之类。当年弄堂里经常有人来爆炒米花，大家侪会爆一点。小囡听闲话，或者考出好成绩，就奖励一点。当然，小囡有辰光也会偷吃，大人晓得了也是眼开眼闭，毕竟不值铜钿，过分了，一顿鸡毛掸子逃勿脱。