上海家常天妇罗

文并图/沈一珠

生鲜店里网购了一大盒冻虾，质量不错，化冻之后，虾看起来还是蛮挺括，呒没掼头搭脑，所以，处理起来也就胆子比较大了。

清蒸、红烧、烧汤，侪试过了，老实讲，侪勿大好吃。顶大个原因，当然是烹饪水平差着眼。勿见得饭店里买出来个虾，只只侪是鲜龙活跳个，但是人家烧出来就是要卖相有卖相，要味道有味道。

空下来就辣想，哪能烧，才对得起搿点大虾呢？也是因为要闷辣屋里，就多买了点，也可以少麻烦人家快递几趟。再讲，快递现在只好送到小区门口，还要麻烦物业送到房门口来。想想，搿勿算是人家名分账个事体，要记人家情。

结果，有天仔看见角落头一大桶油，就想出来了，可以试试日本个天妇罗吃法。还是因为紧张兮兮囤食物，顺便又囤了两大桶油。厨房间里就搿眼地方，一桶油还有地方收，还有一桶只好竖辣眼门前了。眼看天热起来，本来油也用得勿多，辰光长了，也要耗脱。

天妇罗虾个做法是搿能呃：

先隔日夜里拿虾摆到冷藏室化冻。第二天，沥干，撒一点点盐，抓两把干面粉，拿虾侪窝辣面粉里向，一定侪要埋没。

再辣镬子里倒比较多个油，多到可以让虾氽起来个样子。油烧到七八分热，拿虾放下去炸，用炸油条个筷子搛起来，两面翻一翻，颜色金黄就好了。

用吸油纸吸脱一眼油，寻只青花盆子，啪啪满堆好，蛮好看。

因为临时想出来，手头呒没天妇罗粉，所以，只好算是上海家常天妇罗。味道勿错，外焦里嫩，虾肉邪气有弹性，原汁原味，甜津津个。虾壳，酥脆部分也可以吃一眼下去。

第二天又试了一次，面粉稍微少一眼，一是勿浪费，每一份囤来个食物侪要珍惜；二是，虾是主角，薄薄一层面粉是防止虾炸得太老，面粉太多会盖脱虾个味道。

当然，下趟假使要招待客人，还是要买点天妇罗粉，拿虾去头去壳，认认真真学得像样点。

毕竟，大兴天妇罗从色面浪看，还是拿勿大出手个，就像从前家常个淡馒头切片油煎煎，好吃是好吃，就是上勿得台面。