写上海闲话也要讲规矩

文/宓重行

现在朋友圈里勿少人欢喜辣微信等交流工具里用上海闲话进行交流，大家侬写过来我写回过去，弄得闹闹猛猛蛮好白相。勿过，上海闲话毕竟是一种“口语”，要用文字写下来就难免滥用“同音字”，假使写得勿好，勿但对方看勿懂，甚至有辰光还会弄出“一包气”来。

有一趟一位朋友个女儿生病了，伊个闺蜜就辣微信里表达同情和慰问，写了一句“哪囡五真残孤啊”，结果弄得搿位朋友邪气勿开心，啥叫“残”“孤”？介毒辣个字眼用辣人家生病个小囡身浪，两个人差一点点绝交。覅怪人家“迷信”，侬一样写“哪千金真可怜”意思勿是蛮对？就算拿“残孤”改写成“罪过”也要好交交关关。有点朋友勿动脑子，用同音字“拉到篮里侪是菜”，乱七八糟瞎写“上海闲话”，弄得上海人看勿懂上海人写个上海话，实在勿是一桩好事体。

我还读到过迭种文字：“看到交贯90后上海小囡伐会港上海话，挖色啊”“旁友，弄邦邦亡，上海宁伐弄个一讨”。意思基本可以理解，不过文字“语感”相当勿适意，因为写出来就主要是拨人家看个。更覅讲有辰光语言文字一定场合还需要一点美感，勿好一读就产生歧义。拿上头两句闲话来讲，其中“交贯”写成“交关”，“港”写成“讲”，“挖色”写成“难过”，“弄”写成“侬”，“邦邦亡”写成“帮帮忙”，“宁”写成“人”，“一讨”写成“一套”就比较像样了——特别是“邦邦亡”三个字会产生坏个联想，结果能帮忙个人也勿肯帮忙了。

前两天有人辣QQ里和我讨论上海话，伊写了一句：“只有到了疙瘩，泥朵边听到额才是上海闲话。”

我顺水推舟半真半假开伊一记玩笑：“‘泥朵’？烂泥做个耳朵？‘木耳’就勿可以啊？”老朋友回答我:“喔唷！勿要介顶真么。”伊个意思蛮清爽：随便写写，覅一本正经。勿过我觉得，现在写上海话最好还是要讲点规矩。

其实，只要想通一个简单个道理，写上海话是蛮可以做到勿产生歧义，勿出洋相个。汉语言文字原来就有“一字多音”现象：譬方说，辣上海话里向“上海人”就勿必写成“上海宁”，上海人看到“小人、大人、老人”，从来勿会有人读成“小忍、达忍、老忍”；“儿子”一词也勿必为了追求“音同”，写成“呢子”“妮子”“尼子”。读到“朋友”“一套”，呒没人会弄勿懂，而写作“旁友”“一讨”，反而会叫人稀里糊涂。

现在辣工作当中写上海话个几率已经辣勿知勿觉当中提升了交关，所以维护良好个上海话读写环境相当重要，假使大家侪自说自话瞎来来，难免就会捅出意想勿到个娄子来