五虎汤搭仔糊涂粥

文并图/沈一珠

冷风冷雨连牢仔三五天，虽然勿出门，仍旧觉得冷丝丝，身体浪关节里侪瀴丝丝酸痛，恨勿得拿人拎起来甩一甩，绞绞干，让浑身上下的湿气侪滴答干净。迭个辰光，可以笃一碗五虎汤，祛祛寒，除除湿。所谓“五虎”，传统中医里讲的是黑豆、核桃、生姜、红枣、葱白五样物事。勿过，对于平常过日脚来讲，厨房勿是药房，配勿齐食材是常态。呒没关系，就拣有的用一用就好了呀。

勿过，呵呵，最近老欢喜讲“勿过”，是因为日日看天气预报，伊老是讲，现在勿落雨，勿过，一个钟头以后会有雨。有劲口伐，“勿过”毛病过着了。厨房间角角落落翻过去，翻出来赤豆、米仁各一把、陈皮一瓣、红枣三两粒、生姜一块，几样物事侪汏清爽，加把米，笃一镬子五虎粥，吃的辰光摆把红糖，暖热。赤豆米仁健脾利湿，利水消肿。陈皮行气化湿，生姜散寒，红枣补气，几样物事合起来，赛过可以拿人身上的寒气、湿气滗滗清爽。

一直欢喜吃粥，尤其是天冷或者天热辰光。搿两天冷，捧杯热茶孵勒太阳头里，寻寻资料写写物事，齐巧翻到郑逸梅《前尘旧梦》，讲郑板桥也欢喜吃粥，“暇日咽碎米饼，煮糊涂粥，双手捧碗，缩颈而啖之，霜晨雪早，得此周身俱暖。”到底是个画画的，拿平常日脚吃粥的样子，记录得特别有画面感，天冷呀，头颈缩好，取暖呀，双手捧碗，霜雪大冷天的早上，一碗笃得糊里糊涂的粥，难得糊涂，偏偏也是一碗好粥的境界，米正好，水正好，辰光也正正好，稀里糊涂一碗粥下去，身心暖热。

其实大热天里吃粥也一样适意，天热，呒没胃口辰光，一碗清粥，一碟酱瓜，一碟干煎带鱼，吃得清清爽爽，适适意意。郑逸梅讲，袁清平在《啜粥谈》里记，“溽暑困人，脏腑疲劳，怕登饭颗之山，宜啜瓦缶之粥。每于晚风凉院，箕坐胡床，一于盛来，佐以瓜豆，徐徐而啖，口腹爽快。”写得好白相，天热得人昏头落目充，五脏六腑吃勿消，看到一碗饭堆得像山一样，实在爬勿上去呀，还是勿冷勿热一碗薄粥，吃下去适宜。