王伯伯写春联

文/邵天骏

春节前一个礼拜天我出门散步，看到小区门口边浪有邪气闹猛个一群人，就走过去轧闹猛。原来，一位老伯伯正辣聚精会神写春联。每写好一副，就拨人兴高采烈个拿去，留下来一连串笑声。

我认得搿位老伯伯，姓王，今年已经七十二岁了。伊个书法作品，曾经辣勿少评奖活动里获奖，我原本以为请伊写字需要勿少“润笔”，呒没想到伊为小区邻居写春联居然完全免费，连纸张也是自掏腰包。

老伯伯呒没注意到我，依旧辣挥毫泼墨，一个个字落辣红纸头浪，就像缤纷跳跃个“音符”，喜意十足，充满年味。有人怕自家一时头拿勿到，就高声喊：“下一副该轮到我了，大家排好队。”老伯伯面孔浪笑吟吟，轻声细语讲：“勿要急，勿要急，每个人侪有份。”搿样个情景，我已经好多年呒没看到了。

搿能介写春联要写到啥辰光，王伯伯毕竟年纪大了，勿好太吃力个！我轻轻交喊了一声：“王伯伯。”连叫两遍，老伯伯才发觉是辣叫伊。

伊抬起头来看到我，就开心个应道：“侬来了，乃末就好了，快点帮我做桩事体！阿拉小区还有一个会写春联个，侬去拿伊喊来好口伐？”

“好个，好个，我也是搿个意思，正想问问侬。”

“想勿到，现在还有介许多人欢喜贴春联，我心里也是特别开心。”

“或许是因为手写个春联更有一种祝福个味道，同超市里卖个印刷品是勿一样个。”

“嗯，只要大家欢喜，我写得也开心个。”

天色一眼眼暗下来了，排队领春联个人走了一拨又来一拨，勿少人家已经开始辣门口贴春联了，红彤彤个颜色点缀辣小区里，让整个小区侪透出一股喜气。一位年轻个姆妈领仔小囡，手里拿了一副王伯伯写个春联，反复叫小囡“谢谢爷爷，谢谢爷爷”。

冬日暖阳下，看小囡一副天真个样子，我忽然觉得心情开朗，好像自家也变得年轻了。